Kadamo sang aton Renewable Energy sources sa Negros. Ngaa gaka-dulaan pa kita kuryente?

Ang aton kuryente halin sa gina tawag nga "grid", ang power transmission system sang National Grid Corporation of the Philippines (NGCP). Ang bilog nga Panay kag Negros diri konektado. Kun may problema ang grid, apektado tanan. Ang mga Power Producers nagahaboy sang ila produkto nga kuryente sa sini nga grid, kag gina-deliver and ini nga kuryente sa mga konsumidor paagi sa distribution utilities/electric cooperatives. Kun may problema ang power distribution system sang electric coop, maproblema man ang konsumidor paagi sa brownout, blackout, or scheduled power interruption para sa maintenance.

Gani, bisan madamo ang planta sang renewable energy sa Negros, indi buot silingon nga kita ang recta nga magabenepisyo sa sini nga mga planta, kay tanan nga planta, renewable man ukon indi, sa grid gina haboy ang kuryente antes mag abot sa aton panimalay paagi sa electric coop. Sa subong nga sistema, Indi naton mahibal-an kung diin ga halin ang kuryente nga aton ginagamit, kag ang power interruption posible magahalin sa grid, sa power producer, sa electric coop o mismo sa imo linya pasulod sa imo balay.

Ang Provincial Government, paagi sa Negros Occidental Power Sector Assessment Study (NOPSAS), naga duso sang isa ka “systemic solution” para ma sabat ang madamo kag nagkalain-lain nga isyu kag problema nga nagaapektar sang kada sector sang Power Industry. Ang isa ka reporma nga ginaduso amo and pagpadasig sang “transition to renewable energy” kag ang pag-usar sang gina tawag nga Distributed Energy Resources (DER).

Sa sini nga sistema, ang konsumidor mismo ang magasustener sang iya gina-kinahanglan nga kuryente, samtang ang power distributor/electric coop maga-angot recta sa renewable energy source nga mismo ari sa isla sang Negros.

Maga-tinguha ang Provincial Government nga maplastar ang ini nga reporma - dala na ang mga naangot nga solusyon sa iban pa gid nga problema sang industria - paagi sa bulig kag kooperassyon sang mga nagkalain-lain nga sektor, dala na dira ang investors kag financial institutions, ang mga ahensya sang gobyerno, mga service providers, ang pribado nga mga konsumidor, mga gobyerno lokal (LGU’s), kag madamo pa.*